Durante a visita,na que o delegado estivo acompañado polo alcalde da localidade, Alfredo García, e o subdelegado do Goberno en Ourense, Eladio Santos, na que é a súa primeira vista oficial, explicou que o obxecto das obrasé dotar dunha conexión rápida e segura ás estradas N-536 e N-120 que sirva ademais como variante, evitando así o frecuente paso dos camións de lousa das canteiras próximas e do resto de vehículos polo centro urbano.
A conexión das estradas N-536 e N-120 ao seu paso polo Barco é unha obra cunha alta complexidade técnica. Esta nova vía de alta capacidade de 5,6 km de lonxitude inclúe a construción de 6 viadutos (destaca o viaduto sobre o Sil, de 405 metros, e o do río Cigüeño de 258 metros), 1 túnel de 490 metros de lonxitude baixo o monte do Serro, 3 pasos superiores e un inferior.
Actualmente, os traballoscéntranse na execución da infraestrutura que salva a entradas das tubaxes da central hidroeléctrica de Sobradelo; na escavación do arranque do túnel do Serro e na construción dos viadutos do Sil e o río Cigüeño.
“Esta variante, unha vez rematada, está chamada a mellorar a vida dos veciños e veciñas do Barco e de toda a comarca de Valdeorras, aforrando tempo e mellorando a seguridade nos desprazamentos e, ao mesmo tempo, afastando o tráfico do centro da vila”, lembrou o delegado, que aproveitou a visita para repasar co alcalde algúns dos investimentos do Goberno na localidade en materia de eficiencia enerxética, recuperación do patrimonio ou humanización das contornas urbanas. Neste senso, trasladoulle que o Concello “vai ter sempre neste Goberno un aliado para facer os seus proxectos realidade”.
Aposta polas infraestruturas
O delegado aproveitou a visita para salientar os máis de 25 millóns de euros que inviste o Goberno en conservación de estradas na provincia de Ourense, como a N-120 ou a A-52, aos que onte se sumou un novo contrato de 8,5 M€ para todo o Estado que inclúe actuacións preventivas en viadutos destas mesmas vías.
Neste senso, afirmou que este investimento en conservación, que leva crecendo ano tras ano desde a chegada de Pedro Sánchez á Moncloa, “é un exemplo máis do impulso que este Goberno está a dar ás infraestruturas na provincia e que se fai visible tamén nos máis de 500 millóns na modernización do trazado ferroviario entre Lugo e Ourense ou na chegada da alta velocidade a Galicia”.
